PSE TË INVESTONI NË AERONAUTIKË?
Sepse kur mbështet fluturimin, nuk financon vetëm një sport – ndihmon një gjeneratë të ngrihet më lart.
Aeronautika është shumë më tepër se fluturimi.
Ajo bashkon sportin, dijen, teknikën, meteorologjinë, disiplinën, guximin dhe përgjegjësinë. Një i ri që hyn në botën e fluturimit nuk mëson vetëm si të drejtojë një paraglider. Ai mëson ta njohë natyrën, ta kuptojë motin, të marrë vendime, të respektojë rregullat dhe, mbi të gjitha, të kuptojë se në ajër siguria dhe përgjegjësia janë gjithmonë të parat.
Kosova ka male, terrene dhe një gjeneratë të re që dëshiron të fluturojë. Ajo që na duhet është më shumë mundësi për t’ua hapur këtë botë të rinjve.
Fly Dardania ka dekada përvojë në sportet ajrore. Rrënjët tona shkojnë te parashutizmi i viteve ’80, ndërsa nga viti 2000 vazhduam me zhvillimin e paraglidingut. Kemi trajnuar pilotë, kemi organizuar aktivitete e gara dhe kemi kontribuar në ndërkombëtarizimin e sporteve ajrore të Kosovës, deri te pranimi i Kosovës në FAI – Fédération Aéronautique Internationale.
Sot duam të bëjmë hapin tjetër.
Duam që përvoja e krijuar ndër dekada të mos mbetet vetëm te ne, por t’u bartet gjeneratave të reja.
Çfarë financoni kur mbështetni Fly Dardania?
Ju ndihmoni në trajnimin e pilotëve të rinj, zhvillimin dhe masivizimin e paraglidingut, ngritjen e sigurisë dhe profesionalizmit, organizimin e aktiviteteve sportive dhe përfaqësimin e Kosovës në aktivitete vendore e ndërkombëtare.
Por investimi shkon edhe më larg.
Një paraglider mbi malet e Kosovës është një nga mënyrat më të bukura për ta prezantuar vendin tonë. Fotografitë dhe videot nga ajri tregojnë Kosovën që duam ta shohë bota – të bukur, të hapur, aktive dhe plot jetë.
Prandaj, për ne sponsori nuk është vetëm një logo në fanellë.
Është partner i një ideje.
Partner i një piloti të ri.
Partner i sportit.
Partner i Kosovës në ajër.
Nëse jeni kompani, biznes apo bashkatdhetar nga diaspora dhe dëshironi të lini gjurmë në zhvillimin e një sporti me të ardhme, ejani të fluturojmë së bashku.
INVESTO NË ËNDRRËN PËR TË FLUTURUAR.
BËHU PARTNER I FLY DARDANIA.
Kush fluturon, dashuron.
